Mr. Sheremet Ajet Krasniqi – Godeni lindi më 30.6.1947 në Krenajë (ish-Karaçicë) të Malësisë së Drenicës të komunës së Shtimes. Katër klasë të shkollës fillore i mbaroi në Pjetërshticë, ndërsa tetëvjeçaren në katundin Shalë (ish-Sedllar). Shkollën Normale e kreu në Prizren, e Fakultetin Filozofik – Dega e Gjuhës dhe e Letërsisë Shqipe, e mbaroi në Prishtinë. Këtu, pastaj, më 1985, kreu studimet pasuniversitare, kur mbrojti tezën e magjistraturës Komisia Letrare, vendimet e saj dhe rëndësia e tyre në procesin e njësimit të shqipes letrare dhe mori titullin magjistër i shkencave filologjike.
Është pjesëmarrës aktiv i demonstratave të ’68-ës në Prishtinë dhe i të gjitha protestave e revoltave që janë organizuar në Prishtinë kundër pushtuesit serbo-sllav.
Pasi kishte mbaruar shkollën normale në Prizren, më 1967, ai një vit punoi në Janjevë, ku dha gjuhë shqipe dhe gjuhë frënge. Katër vjet të tjerë dha gjuhë shqipe në Gjimnazin e Lypjanit e pastaj punoi në Radio-Prishtinë, ku kryente detyrën e lektorit të gjuhës shqipe. Që nga viti 1975-2000 ka punuar lektor, redaktor gjuhësor dhe redaktor i fejtonistikës në gazetën e përditshme “Rilindja“. Pas mbylljes së “ Rilindjes “, ka filluar të punojë në Redaksinë Dëshmorët e Ushtrisë Çlirimtare të Kosovës në projektin e monografisë “Feniksët e lirisë” , në cilësinë e anëtarit të redaksisë e redaktorit gjuhësor. Prej vitit 2004-2012, ka punuar në Ministrinë e Administratës Publike të Republikës së Kosovës si lektor. Ndërkohë, ka lekturuar dhjetëra libra fushash të ndryshme si dhe disa botime të Akademisë së Shkencave e të Arteve të Kosovës. Ka mbajtur kumtesa në disa simpoziume e konferenca shkencore, që i kanë organizuar Akademia e Shkencave dhe e Arteve e Kosovës dhe Instituti Albanologjik i Prishtinës. Përveç që është marrë me çështje gjuhësore, kohë pas kohe ka botuar edhe artikuj publicistikë, në të cilët ka trajtuar tema nga jeta jonë kombëtare.
Më 1997, ka botuar monografinë historiko-letrare Hasan Hysen Budakova, ndërsa më 2004, botoi veprën shkencore Komisia Letrare e Shkodrës (1916-1918). Më 2017, Lidhja e Shkrimtarëve e Kosovës ia botoi librin Studime gjuhësore dhe publicistikë. Ky është libri i tij i tretë dhe njëkohësisht këtë e konsideron vepër jetësore të tij. Ka qenë veprimtar i Lëvizjes Gjithëpopullore të Pajtimit të Gjaqeve (1990-1992) dhe anëtar i këshillit qendror “Anton Çetta“ të Kosovës.
Është anëtar i Shoqatës së Gjuhës Shqipe të Kosovës.
Autori jeton dhe vepron në Prishtinë.