SADIK BICAJ
Lindi në Vrellë të Istogut, më 21.10.1958. Shkollën fillore e kreu në vendlindje, të mesmen në Pejë, SHLP-në në Gjakovë, ndërsa Fakultetin e Filologjisë, Dega e Gjuhës dhe e Letërsisë Shqipe, në Universitetin e Prishtinës.
Është anëtar i Shoqatës së Gjuhës Shqipe të Kosovës, anëtar i Lidhjes së Shkrimtarëve të Kosovës, bashkëpunëtor i jashtëm i Institutit Albanologjik të Prishtinës dhe kryetar i klubit letrar “Podguri” të Istogut.
Merret me poezi, gjuhësi, kritikë letrare dhe publicistikë. Një kohë të gjatë, para luftës së UÇK-së, punoi në shkollën fillore “Fazli Graiçevci” të Hades së Obiliqit, pastaj në shkollën fillore “Hysni Zajmi” të Vrellës, ndërsa pas luftës disa vjet në gjimnazin “Haxhi Zeka” të Istogut, ndërsa nga vitit 2010 është drejtor në SHFMU “Hysni Zajmi” të Vrellës.
Krahas punës në arsim, dhjetë vjet paslufte, ishte edhe korrespondent i rregullt i gazetës “Koha Ditore” nga Istogu, ndërsa krahas kësaj një kohë ishte edhe përgjegjës për kulturës në Drejtorinë e Arsimit dhe drejtor në Shtëpinë e Kulturës “ Adem Jashari” të Istogut.
Deri tash ka botuar këto vepra:
“Plaga e kurbetit”, dramë, 1992
“Zëri i pikëllimit”, poezi, 1994
“Artikuj gjuhësorë praktikë”, 1996
“Historiku i shkollave fillore të komunës së Istogut”, monografi, 1997
“Vështrime letrare”, 2000
“Rrugët drejt lirisë”, ditar nga lufta, 2002
“Sylë Vrella, mjek i njohur popullor”, monografi, 2006
“Teste nga Gjuha Shqipe e Letërsia”, 2008
“Fadil Ferati, veprimtar i denjë i lirisë dhe pavarësisë” (monografi), 2014
“Vështrime gjuhësore e letrare”, 2019
“ Këndvështrime gjuhësore në romanin “Gjenerali i ushtrisë së vdekur”
Vëllimi poetik i tij “Zëri i pikëllimit”, 1994, i është përkthyer në gjuhën suedeze, 2020,
nga Shoqata” Dora e artë” në Malmo.
Sadik Bicaj është përfshirë në “Leksikonin e shkrimtarëve” të Hasan Hasanit, në
“Leksikonin enciklopedik” të Akademisë Shqiptare Amerikane, 2020, të autorit Flori Bruqi, në “Antologjinë e poezisë moderne shqipe” të autorit Adem Zaplluzha etj.
Jeton dhe vepron në vendlindje.
FJALË NË GUR
Hap pas hapi
Të gjitha i zë
Kap rrënjët e fjalës
Në rrasë të purpurtë
Në shkallë të rrezuara të jetës
Çaj ankthin në Grykë të Lugetërve
Dhe më besoni
Nga Skila në Grykë
Në sytë e natës skëterrë
Fytyra djajsh shoh në përftim
Tek ndiej fjalë në gur
Njerëzit po vijnë
Njerëzit po shkojnë
Tani sikur u zhdukën largësitë
Të bëhen legjendë