Rexhep Halimi lindi më 23.04.1954, në Dumnicë të Poshtme të Besianës. Shkollën fillore e kreu në fshatin e lindjes, gjimnazin në Besianë, ndërsa studimet i ndoqi në Fakultetin e Filologjisë të UP-së – Dega Gjuhë dhe Letërsi Shqipe.
Me krijimtari letrare ka filluar të merret që në kohën kur ishte nxënës i shkollës fillore. Poezinë e parë “Maji” e botoi në vitin 1971 në gazetën “Rilindja”- faqja për fëmijë. Asnjëherë nuk e ka ndërprerë krijimtarinë e tij letrare dhe kohë pas kohe krijimet e tij i ka botuar në gazetat dhe revistat që botoheshin në Kosovë.
Po ashtu është marrë edhe me artin dramatik, qe anëtar i SHKA “Josip Rela” të Besianës.
Që nga viti 1974 punon në procesin edukativo-arsimor, ku ka dhënë një kontribut të çmuar edhe në aktivitetet kulturore e letrare me nxënësit e tij; nxënësit e tij disa herë janë nderuar me mirënjohje dhe shpërblime në aktivitetet e ndryshme. Në kuadër të shkollës në Dumnicë të Poshtme ka formuar grupin letrar “Kadri Kadriu”.
Deri tani ka qenë aktiv në shumë manifestime të ndryshme dhe disa herë në konkurset letrare është nderuar me çmime letrare. Ndonëse me shkrime është marrë që herët, shumë krijime të tij i janë shkatërruar në luftën e fundit.
Ka botuar këto vepra letrare:
Rreze e thyer, poezi, “FAD”, Prishtinë, 2017.
Buzëqeshje në mesditë, poezi për fëmijë, “FAD”, Prishtinë, 2018.