RAMADAN HAXHIAJ
Lindi më 15.5.1955 në fshatin Gjinoc të Therandës (Suharekës). Shkollën fillore e ka mbaruar në vendlindje, të mesmen, në gjimnazin “Jeta e re” në Therandë. Në vitin 1980 ka kryer studimet në Universitetin e Prishtinës, Fakulteti Filozofik, Dega Letërsi dhe Gjuhë Shqipe.
Në vitin 1981 ka filluar punën në arsim, në shkollën fillore të Mushtishtit, të Greikocit, në gjimnazin “Jeta e re” dhe në shkollën e mesme teknike “Skënder Luarasi” në Therandë. Nga viti 2001 deri më 15.5. 2020 ishte drejtor i shkollës 9-të vjeçare “Migjeni” në vendlindje.
Me shkrime ka filluar si student i grupit letrar “Jeronim de Rada” të Fakultetin Filozofik të UP-së. Nga grupi letrar është përjashtuar në vitin 1978 për shkak të një poezie me përmbajtje për kombëtare. Kudo që ka punuar, ka formuar grupe letrare.
Që nga viti 1993 është anëtar i kryesisë së shoqatës për art dhe letërsi “Elena Gjika” dhe udhëheqës i sektorit të letërsisë dhe organizime letrare në Therandë. Në kuadër shoqatës kanë botuar dymbëdhjetë vepra me grup autorësh titulluar “Brerore lirie”.
Ka botuar poezi në gazeta të ndryshme letrare dhe në disa monografi, si në atë të Halil Haxhosajt dhe në dy antologji me titull “Korsi e hapur” në Tiranë nga “PegasAlbania”, ku dhe është anëtar.
Është redaktor e recensues i disa botimeve me poezi dhe autor i recensioneve e i parathënieve të disa librave të autorëve të ndryshëm.
Në vitet ’90 të shekullit të kaluar ka udhëhequr mësimin shtëpi-shkolla – shkolla e mesme.
Kryetar i shoqatës “Gjuha shqipe”, dega në Therandë.
Anëtar i Kryesisë së LASH-it, dega në Therandë dhe delegat i LASH-it në Prizren.
Kryetar i Pajtimit të gjaqeve – nëndega në fshat.
Kryetar i shoqatës humanitare “Nëna Terezë” në fshat dhe anëtar i Kryesisë së degës në Therandë, sektori për arsim.
Epror i lartë në UÇK-së, Brigada 123, ZOP, Batalioni Dytë në Budakovë.
Drejtor i shkollës “Migjeni” (2001 – 15.5.2020).
Veteran i Luftës dhe i Arsimit.
Ka botuar këto vepra:
“Ritual i bëj bukurisë”, poezi, 2004
“Pika shiu”, poezi, 2013
“Ëndërr e ndrydhur”, poezi, 2015
“Monografi për shkollën 9-të vjeçare “Migjeni” të Gjinocit, 2018
“Ëndrrat në djep përkundën”, poezi për fëmijë, 2021
Ka në dorëshkrim një ditar lufte – 14 muaj shërbim në UÇK.
PËRKUSHTIM
Nata ndez kandilin
E ti krahëhapur si mjellmë fluturon
Yjet nga lart rrugën ta ndriçojnë
Mbi horizont flokët tua flakërojnë
Aty ku loket ninulla këndojnë
Lulëkuqe ti që thur simfoni
Ati yt në bronz qëndron ballëlart
Që t’i bëjë roje lirisë
Kullat kreshnike lartësojnë këngët me lahutë
Bijë dëshmori n’shami duke qëndisur
Emra dëshmorësh emra të lirisë
Mesnata shpirtin ta shtrëngon
Nata me rreze hëne ëndrrat i flakëron
Dielli lind me aromë lirie
Dëshmorët vijëzojnë atdheun
Në etjen e vargjeve
Kur dielli vret kohën e mpirë
Si Feniksit ngarendin
Me nga një copë Kosovë të lirë