QAZIM H. BERISHA
Lindi më 14 dhjetor 1953 në lagjen Xhafolli, të fshatit Drenoc – Barilevë të Prishtinës. Shkollën fillore e kreu në vendlindje, normalen e filloi në Prishtinë, kurse e përfundoi në normalen “Hasan Prishtina” të Mitrovicës. Në Universitetin e Prishtinës kreu Fakultetin e Filologjisë – Dega e Letërsisë dhe e Gjuhës Shqipe. Punoi mbi 44 vjet në arsim si mësues i letërsisë dhe i gjuhës shqipe.
Me krijimtari letrare filloi të merret qysh në bankat e shkollës fillore.
Është anëtar i Lidhjes së Shkrimtarëve të Kosovës.
Jeton dhe vepron në Prishtinë.
Ka botuar këto vepra:
Lot gjaku, poezi, Prishtinë, 1995 (është libri i parë i botuar në Kosovë që u kushtohet 105 martirëve dhe dëshmorëve të rënë në vitet 1981-1991)
Në zemrën time banon dhembja, poezi, Prishtinë, 2005.
Nënëlokja, monografi, Prishtinë, 2011.
Kronikë pas lufte, publicistikë, Prishtinë, 2013
Aglirie, poezi, Prishtinë, 2014.
Fanar drite poezi, Prishtinë, 2017.
555 aforizma ndritin rrugën, aforizma aktual, Prishtinë, 2018.
Oksigjeni i gjyshit, përmbledhje tregimesh për fëmijë, Prishtinë, 2018.
Kur vitet ikin, poezi, Prishtinë, 2018.
Nuk ta fal dhembjen, poezi, Prishtinë, 2018.
Rrugës së përjetësisë, roman, Prishtinë, 2020.
Ushtarët shqiptarë të vrarë në armatën jugosllave 1951-1993, monografi, Prishtinë, 2021.
RRUGA E LIRISË
ishte tepër e gjatë
aq sa ishin të gjata
vuajtjet tona
aq sa ishin të pandërprera
sakrificat tona nëpër shekuj
por mbi të gjitha ishte
gjakimi ynë i vazhdueshëm
drejt synimeve tona
që më në fund
u kurorëzua me fitore të madhe
me LIRINË e shumëpritur
fal trimave të maleve
fal gjakut të dëshmorëve
që e ujitën me gjak
çdo pëllëmbë toke
Liria është diell
që rrezon çdo cep
të ATDHEUT tonë