Dr. Nuhi Veselaj lindi në fshatin Reçan të Therandës (ish-Suharekë) më 20.8.1933. Shkollën fillore (me semimaturë) e kreu në Suharekë (1948), shkollën normale (katërvjeçare) e mbaroi në Gjakovë, ku maturoi më 30.6.1952. Provimin shtetëror profesional e dha më 3.9.1959 në Prizren. Shkollën e lartë, përkatësisht shkallën I të Fakultetit Filozofik të Prishtinës – Dega e Gjuhës dhe e Letërsisë shqipe e kreu më 23.9.1963, ndërsa Fakultetin Filozofik të Prishtinës – Dega Gjuhë dhe Letërsi Shqipe, më 23.11.1965.
Ndoqi studimet pasuniversitare dhe më 3.4.1980 mori gradën magjistër i shkencave filologjike, ndërsa tezën e doktoratës e mbrojti më 24.12.1992.
Jeton në Prishtinë. Është anëtar i Shoqatës Mbarëkombëtare të Shkrimtarëve për Fëmijë dhe të Rinj me qendër në Tiranë, si dhe anëtar i Lidhjes së Shkrimtarëve të Kosovës. Është Anëtar Nderi i SHAK “Elena Gjika – Dora d’ Istria”, Therandë.
KONTRIBUTI NË AVANSIMIN E GJUHËS DHE TË IDENTITETIT SHQIPTAR
Qysh i ri, që nga viti 1951 ishte i organizuar në Lëvizjen për çlirimin dhe bashkimin e tokave shqiptare. Në vitin 1952 u burgos për veprimtari të tillë, por për moszbulim provash nga ai, u dënua vetëm dy vjet. Pasi doli nga burgu, ndonëse me vështirësi arriti të ripunësohej në arsim që e kishte ideal veprimësie. Disa herë pati ndërprerje të dhunshme nga marrëdhënie e punës (8 herë): Mushtisht (Suharekë) 1952, Suharekë 1956, Grejçec (Suharekë) 1957, Ferizaj 1962, Zllatar, Tankosiq (Ferizaj) 1963, Prishtinë 1972, 1973, kur për motive politike iu ndalua puna në arsim e organizata shoqërore-shtetërore. Pas një kohe si i papunë u detyrua të punësohej në ndërmarrjen për ndërtimin e rrugëve “Partizanski put” të Beogradit – dega në Prishtinë, prej nga kaloi në Uzinën e amortizatorëve të Prishtinës, përkthyes. Edhe prej andej më 1991 e larguan, andaj u detyrua të dalë në pension të parakohshëm.
Edhe pse, pothuajse ishte përherë nën mbikëqyrje, ai, përkundër pengesave e përndjekjeve, me punë të palodhshme dhe me qëndrim konstruktiv e parimor arriti të korrë suksese, qoftë në jetën arsimore e shoqërore-politike, qoftë në veprimtarinë letrare e shkencore. Edhe gjatë Luftës së fundit, ai dhe familja e tij nuk ishin pasivë, përkundrazi kryen punë delikate e me rrezik. Në shtëpinë e tij në Prishtinë, muaj të tërë, gjetën strehim e shërim ushtarë të plagosur të UÇK-së.
Është e vërtetë se kur filluan bombardimet e NATO-s, shtëpia e tij qe objekt sulmi me bombë nga paramilitarët serbë. Disa herë i është rafaluar servisi, garazhi si dhe muret e shtëpisë. Si mbarë popullata gjatë eksodit të madh, edhe ai u detyrua të shkojë drejt Maqedonisë, mirëpo, në zonën neutrale në Glloboçicë (në vend që të shfrytëzonte rastin për të vizituar vajzën në SHBA, si dhe djalë e vajzë në Zvicër me familjet e tyre që s’i kishte parë me dekada, pasi, përkundër tentimeve, atij i qe ndaluar dalja jashtë Jugosllavisë, ky pasi e bekon djalin, me të cilin ishin bashkë, që t’i bashkohet UÇK-së, duke i hyrë rrezikut, kthehet në Prishtinë, ku ka dhënë ndihmesën e vet në mënyra të ndryshme deri në çastin kur çlirimtarët i priti dhe përshëndeti me ndonjë libër të tij, por edhe me një material modest buroteknik. Ndërkohë kreu me nder çdo angazhim që iu besua, por nuk u ekspozua në parti politike, më tepër u përqendrua në veprimtarinë krijuese.
VEPRIMTARIA LETRARE E SHKENCORE
Është marrë me shkrime që në bankat e shkollës së mesme, por për arsye që tashmë dihen, edhe për shkak të përmbajtjes, s’ka mundur të botojë të gjitha dorëshkrimet. Përveç prozë e poezi në revista e gazeta të ndryshme, publikoi edhe punime shkencore nga fusha e gjuhësisë.
Deri tashti nga fusha e letërsisë ka botuar:
- Miklime (vjersha për fëmijë), “Rilindja”, Prishtinë 1967), (ribotim) 1997
- Rrezet e ylberta (vjersha për fëmijë), “Rilindja”, Prishtinë, 1971), (ribotim) 1997
- Me buzët në gaz (vjersha për fëmijë), “Iliriku”, Prishtinë, 1997
- Fletë ditari rreth një motmotari (vjersha), “Iliriku”, Prishtinë, 1997
- Trimoshi (tregime për fëmijë dhe të rinj), “Iliriku”, Prishtinë, 1997
- Cace e hope djaloshare (poezi), “Iliriku”, Prishtinë, 1997
- Shfrime nëpër mjegullnajë (reflekse poetike), “Iliriku”, Prishtinë, 1997
- Mësime nëpër pësime (shfaqje teatrore), “Iliriku”, Prishtinë, 1998
- Gërricje në damarët e djalërisë (tregime), “Rozafa”, Prishtinë, 1998
- Bulëza të përshenjura, (vjersha kushtuar stinës rinore), “Rilindja”, Prishtinë, 2000
- Ther me pupël (vjersha humoristike), “Rilindja”, Prishtinë, 2000
Nga fusha e gjuhësisë:
- Çështje të shqipes standarde në fushë të leksikut dhe të fjalëformimit I, “Rilindja”, 1997
- Paskajorja, çështje e shqipes standarde, “Dardania sacra”, Prishtinë, 2000
- Foljet më -O – në gjuhën shqipe, “Dardania sacra”, Prishtinë, 2002
- Paskajorja dhe standardizimi i gjuhës shqipe, Prishtinë, 2006
- Rreth formësimit të emërtimeve të njerëzve sipas profesionit në gjuhën shqipe (tezë doktorate), MASHT e RK-së, Prishtinë, 2014
- Rreth identitetit të gjinisë asnjanëse në shqipen e sotme, “Era”, Prishtinë, 2015
- Shumësi dhe shquarsia e emrave në shqipen standarde, “Era”, Prishtinë, 2015
- Drejt standardizimit të gjuhës shqipe, “Era”, Prishtinë, 2015