MUJË S. BERISHA
Lindi në fshatin Vërban të Vitisë, më 27 nëntor 1943. Shkollën fillore e kreu në rrethin e vendlindjes (Sodovinë e Jerlive, Goshicë dhe Viti), kurse normalen dhe fakultetin filozofik – dega gjuhë dhe letërsi shqipe Në universitetin e Prishtinës.
Shumë vjet punoi në procesin edukativo-arsimor si mësues, arsimtar, profesor dhe drejtues i disa institucioneve edukative arsimore në Viti, në Ferizaj dhe në Prishtinë. Ishte drejtor i përgjithshëm i kolegjeve “Aga Xhite” në Ferizaj dhe “Universum” në Prishtinë. Për kontributin e tij shumëvjeçar në arsim është shpërblyer me shumë mirënjohje dhe me dekoratë.
Herët është interesuar për letërsi, duke qenë dhe një lexues i pasionuar. Me shkrime ka filluar të merret qysh si nxënës i tetëvjeçares në Goshicë. Punimet e para i ka botuar në fletushkën e shkollës “Filizat”. Më vonë, nga vitet ’90-ta të shek. XX, ka filluar të merret intensivisht me krijime letrare për fëmijë. Merret edhe me publicistikë. Bashkëpunoi me revistat dhe gazetat “Rilindja”, “Bujku”, “Pionieri”, “Zog mëngjesi”, “Mollëkuqja” etj.
Deri tani i ka botuar këto vepra:
“Zeqë Vërbani dhe koha e tij” (monografi), SHB “Koha jonë”, Prishtinë, 1997
“Kalorës kaltërsie”, vjersha për fëmijë”, SHB “Iliriku”, Prishtinë, 2000
“Piktori i vogël”, tregime për fëmijë, SHB “Rozafa”, Prishtinë, 2002
“Lulja e zemrës”, roman për fëmijë e të rritur, SHB “Rozafa”, Prishtinë, 2010
“10 vjet drite e rrite” (monografi për kolegjet “Aga Xhite” dhe “Universum”), botues kolegji “Universum”, Prishtinë, 2013
“Dhurata më e shtrenjtë”, vjersha për fëmijë, SHB “SAS”, Prishtinë, 2013
“Lulja e zemrës”, roman për fëmijë e të rritur, botim i dytë, Botimet Filozofia Urbane, w. w. w. libraria elektronike, 2013
“Sundimtari i ri dhe kutia magjike”, tregime për fëmijë, SHB “Faik Konica”, Prishtinë, 2016
“Tahir Z. Berisha – Një jetë në mision të dijes dhe të idealeve kombëtare” (bashkautor me Hamza Halabakun), “Faik Konica”, Prishtinë, 2018
“Familja emblematike – Myftiu nga Sllatina e Anamoravës – begati e traditës atdhetare, arsimore dhe fetare” (bashkautor me Fahri B. Hoxhën), SHB “Faik Konica”, Prishtinë, 2021
Është anëtar i Lidhjes së Shkrimtarëve të Kosovës dhe anëtar i Karvanit të Shkrimtarëve për Fëmijë.
Jeton në Prishtinë.
MEDITIME FLUTURAKE
(Kovidi 2019)
Sonte, s’ di se si, i mbërthyer jam në një vello vetmie.
I mbështjellë në guacën time,
një mallëngjim zhuritës në shpirt më ngacmon.
Edhe përpëlitem të dal nga zagushia ngulfatëse…
Oh, koka se si më rëndon…!
Sikur të ndodhë një shpërthim universi…
Meditime fluturake më bartin larg, larg…
Atje, ku rrah tik-taku i zemrës, malli më sëmbon.
Oh, vetëm Muza ime, e mira, shpirtin, ma qetëson…
Sonte, se si jam mbërthyer në një vello vetmie!
Përgjërohem për një përqafim dielli, hëne, yjesh dritësimi…
Edhe përhumbem në meditimet e mia… larg, larg…
Oh, çfarë përmallimi në këto çaste tundimi…