Ismail Simnica

ISAMIL SIMNICA

Lindi më 18.02.1953, në katundin Lajthishtë të komunës së Kastriotit. Rrjedh nga një familje bujare dhe me tradita kombëtare. Shkollën fillore e kreu në katundin Lajthishtë dhe në Hade, shkollën e mesme teknike – seksioni i makinerisë në Prishtinë, ndërsa fakultetin teknik, degën e inxhinierisë mekanike në Universitetin e Prishtinës. Qysh si nxënës zgjoi interesim të madh ndaj leximit dhe fitimit të njohurive të reja. Mirëpo, tërë potencialin e tij ia kushtoi teknikës, që aq shumë e deshi. Kjo ndodhi edhe nga frymëzimi i tij për përmirësimin e kushteve të rënda të punës, që i kishte parë në minierën e linjitit të Kosovës, ku punonte i ati i tij minator dhe sulmues i shumëfishtë. Megjithëkëtë ai herë pas here nuk harroi të thurte vargje të ngrohta për vendlindjen, atdheun, për të atin e tij dhe për dashurinë rinore. Shkroi vargje edhe për figurat më eminente të popullit tonë.
Ka marrë pjesë në demonstratat e studentëve dhe të nxënësve të vitit 1968, më 1981 dhe në tubimet e organizuara kundër pushtuesit serb që nga viti 1989. Me ngulm i ka kundërshtuar ndryshimet kushtetuese të vitit 1989.
Detyrën që e ushtroi si mësimdhënës në shkollën teknike të Besianës dhe të Kastriotit, atë edhe më shumë e nxiti që të shkruajë në heshtje për atë që e mundonte zemrën e tij, por edhe tërë popullin tonë. Meqë zhvillimit të energjetikës në atë kohë i nevojiteshin kuadro të reja të këtij profili, pas diplomimit në fakultetin e makinerisë kalon në Elektroekonominë e Kosovës, përkatësisht në termoelektrocentralet “Kosova A”, së pari si inxhinier i prodhimit të energjisë elektrike, pastaj si udhëheqës i prodhimit dhe së fundi si ekspert për çështje teknike dhe për përgatitjen e kuadrit profesional për udhëheqjen e termocentraleve. Një kohë ka qenë anëtar i komisionit profesional për provime shtetërore, për manipulues të pajisjeve nën trysni në Kuvendin e Kosovës. Gjatë viteve të nëntëdhjeta, kur pushteti serb suprimoi të gjitha të drejtat e shqiptarëve, u vu në krye të sindikatës së pavarur të punëtorëve të prodhimit në termocentralin “Kosova A” duke kontribuuar në grumbullimin e mjeteve financiare për ndihma punëtorëve të larguar nga puna, për arsim, për minatorët e “Trepçës”, për zhvillimin e kulturës në komunën e Kastriotit, për Ushtrinë Çlirimtare të Kosovës dhe për shkollën fillore “Ismail Qemali” të Prishtinës. Përveç punës në termocentrale, ai është anëtar i kryesisë dhe sekretar i shoqatës së shkrimtarëve “Fahri Fazliu“ të Kastriotit dhe njëherësh edhe anëtar i Lidhjes së Shkrimtarëve të Kosovës. Ka marrë shpërblime në konkurset letrare në manifestime të ndryshme. Me rastin e festimit të 20-vjetorit të veprimtarisë në shoqatën e shkrimtarëve “Fahri Fazliu” të Kastriotit shpallet poet më i suksesshëm i Shoqatës për vitin 2010.
Jeton në Prishtinë.

 Ka botuar këto vepra:

“Pranvera e Lirisë”, 2003
“Trojet kërkojnë”, 2005
“Merr fluturimin, merr”, 2007
“Të Falemi, o Zot”, 2007
“Pavarësia”, 2010
“Familja ime”, 2015
“Vrragë shkujsh”, 2018
“Toplica”, 2019
“Në dritën e Hënës”, 2021
“Doracak termoenergjetik”, 2006
Pesë “Doracakë udhëzimesh praktike për shfrytëzimin e kapaciteteve termoenergjetike në TC ”Kosova A”, 2006 dhe 2014
“Rrugëtimi ynë”, 2017
“Kolosi i termoenergjetikës kosovare”, 2018
“Të dhënat për pajisjet e termocentralit “Kosova A”, 2019
“Detyra të zgjedhura nga matematika”, 2021