Halil Xani lindi më 1952, në fshatin Polac të Skënderajt. Shkollën fillore e mbaroi në Polac e Skënderaj, ku e kreu edhe gjimnazin. Mbaroi studimet në Degën e Gjuhës dhe të Letërsisë Shqipe të Fakultetit të Filologjisë të Universiteti të Prishtinës.
Nga viti 1974 e deri në vitin 1976, punoi arsimtar i gjuhës shqipe në shkollën fillore të Qirezit, kurse në shkollën fillore të Polacit nga viti 1976 deri në vitin 1983. Nga viti 1983 e deri në vitin 1990, punoi gazetar në Radio-Mitrovicë, deri atëherë kur policia serbe i dëboi me dhunë punëtorët shqiptarë nga puna dhe mbylli programin shqip.
Pas luftës së fundit, nga një vit punoi gazetar në të përditshmet “Dita” dhe “24 orë” në Prishtinë, si dhe dy vjet drejtoi programin e Radio-Drenicës.
Jeton dhe vepron në Polac të Skënderajt.
Pos vjershave për fëmijë, të cilat i botoi që nga viti 1971 e këndej, në gazeta e revista të ndryshme, që dilnin në Prishtinë e Shkup, shkruan edhe humor.
Më 18.10. 1971, për herë të parë në gazetën BAT ka botuar tregimin me titull “Kush flet në radio”, pastaj ka botuar në “Rilindjen për fëmijë”, “Pionieri”, “Gazeta e pionierëve”, “Flaka e vëllazërimit”, “Fatosi”, “Gëzimi”, “Thumbi”, “Zëri i rinisë”, “Kosovarja”, “Bujku” (revistë për bujqësinë), “Bujku” (pas ndalimit të “Rilindjes” qe bërë gazetë ditore), “Shëndeti”, “Kosovatransi” (gazetë e kolektivit), “Morri” (revistë e humorit). Pjesë humoristike e krijime letrare i janë transmetuar në Radio-Mitrovicë e Radio-Prishtinë (Programi i dytë); i janë botuar në gazetat “Dita”, “24 orë”, “Zëri ditor”, “Kosova sot”, “Epoka e re”, “Bota sot”, “Vizioni” (revistë e PTK-së), “Republika” – revistë e ilustruar, Radio-Drenica, Skënderaj, Radio-Kosova, -Radio-Mitrovica (e re), Radio-Ylberi, Mitrovicë, Radio-Globi, Mitrovicë etj.
Me shkrime të zhanreve të ndryshme paraqitet edhe nëpër shumë faqe të internetit.
Deri tash ka botuar:
Ndal drenushë, vjersha për fëmijë, “Agora”, Mitrovicë, 1996
Unë e babi mjeshtër, vjersha për fëmijë, botim i autorit, Prishtinë, 2005
101 Qyfyret e Nastradinit, vjersha sipas anekdotave, botim i autorit, Prishtinë, 2009
Pak për mahi më shumë përnjëmend, mahi të shkurtra, “Shqipëria etnike”, Prishtinë, 2009
Ec e mos u bëj nervoz, vargje satirike, “Shqipëria etnike”, Prishtinë, 2010
Borxhin e hëngri qeni, mahi të shkurtra, “Shqipëria etnike”, Prishtinë, 2010
Gjuha e zemrës, vjersha për fëmijë, “Shqipëria etnike”, Prishtinë, 2012
Prekja e pikëllimit, monografi kushtuar Adem Berishës; bashkautor, “Olymp”, Prishtinë, 2013
M’i akuzojnë sytë, vargje satirike, “Meshari”, Prishtinë, 2015