AGIM HAJDINI
Lindi më 24 nëntor 1961, në fshatin Prelez i Jerlive, komuna e Ferizajt. Shkollën fillore e kreu në vendlindje, të mesmen, shkollën e mjekësisë “Ali Sokoli” në Prishtinë, kurse studimet në Fakultetin e Laborantëve të Mjekësisë në Tiranë.
Me shkrime merret që nga shkolla e mesme, kryesisht me poezi e tregime për fëmijë. Ka botuar nëpër revista dhe gazeta për fëmijë, si: “Rilindja për fëmijë”, “Shëndeti”, “Bujku”, “Pionieri” etj. Punon në QKMF të Ferizajt, që nga viti 1984.
Jeton dhe vepron në vendlindje.
Ka botuar këto vepra:
“Jetës i buzëqesh dielli”, poezi dhe tregime për fëmijë, 2014
“Shtëpia me gjashtë çati”, tregime për fëmijë dhe të rinj, 2017
Libri “Infermieria ferizajase” (bashkautor)
“Shtigje”, roman
NË VDEKJE KËRKONTE SHPËTIMIN
Në fshatin shkrumb e të boshatisur
Thyen qetësinë ndonjë mace e harruar,
A lehje të trishta të qenve të uritur.
Këtu edhe zogjtë kanë braktisur çerdhet e tyre,
Gjithkah heshtje varri e trishtim vdekjeje
Kundërmim gjaku vjen.
Barbarët shamikuq e të dozuar,
Turren të pangopur nga epshet prej gjakësori
Dhe vënë dorën mizore mbi fëmijë, gra e pleq,
Mjeranët filluan misionet e tyre ogurzeza
Mbi trupa të pafajësisë.
Dhimbshëm vjen një zë nëne,
As e gjallë, as e vdekur, përpëlitet me jetën,
Plagët i kullojnë nga të dy këmbët,
E barku i hapur me zorrët jashtë,
Kërkon vdekjen ta shohë me sy
Para se gjakësorët të kthehen përsëri.
Me gjysmëzëri që mezi nxjerr nga buzët e thara,
Kërkon shpëtimin në vdekjen e saj:
– Lutem në emër të zotit t’më kuptoni!
Vëllezër, nga ju kërkoj ta kryeni këtë amanet,
Mes varreve të burrit dhe fëmijës tim ma bëni një vend!
Me fjalët e fundit në gojë mbylli sytë përgjithmonë
Dhe në përqafimin e të dashurve të saj
Mori me vete mallin, kujtimet, lojën e fëmijës,
Që dje vraponte i gëzuar, prekte rrezet e diellit
Me dritën e përflakur të mallit prindëror